السنيـن بحزنهـا والا سعـدهـا
الله اللي عالـمٍ كـم هـو عددهـا
السنـه لامـرّت بعمـر البنـادم
قام يسحب فالسنين اللـي بعدهـا
غير رجلا ماحسب باقـي سنينـه
باعهـا فـي سجـدة لله سجدهـا
يـوم داره نادتـه لبـى نـداهـا
قال : حنا عزوة الـدار وسندهـا
ماتوانى يوم جـت حـزة وقوفـه
ولانسى خير البـلاد ولا جحدهـا
سلم , وودع , ونادى : ياعيالـي
السعوديـه تمـد اليـوم يـدهـا
والسعوديـه انـا وانتـم فداهـا
تبشر ان نادت على الموت بسعدها
كان ربي كاتبٍ لي عمـر ابرجـع
وكان مت الروح عند اللي وجدها
كبـر وهلـل ووكلهـا علـى الله
واستوت ضلعان جيزان وصعدهـا
طلقة دونه , وطلقه مـن يمينـه
وياخذ اللي يطلق الطلقـه سددهـا
لين جاتـه طلقـة ماهـي لغيـره
واحتضنهـا دون داره مانشدهـا
قال : يارب النصر والا الشهـاده
واعد وجات الشهاده في وعدهـا
ماتخون الارض دمك يا ( هليـل )
ولاتموت ارواحٍ اوفت في عهدهـا
ولاتضام الدار يالشعب السعـودي
دام من يشبه ( هليل) هو ولدهـا